តួកគី ៖ គ្រោះរញ្ជួយផែនដីកម្រិតធ្ងន់រហូតដល់ទៅ ៧.០រ៉ិចទ័រ បានវាយប្រហារទីក្រុងជាប់តំបន់ឆ្នេរ នៃភាគខាងលិចប្រទេសតួកគី នៅថ្ងៃសុក្រ ទី៣០ ខែតុលា ឆ្នាំ២០២០បានសម្លាប់មនុស្ស១២នាក់ស្លាប់ និងជាង៤០០នាក់រងរបួស។ នេះបើតាមការចេញផ្សាយដោយ AFP។

បើតាមអភិបាលក្រុងអ៊ីស្មឺ (Izmir) បានឲ្យថ្លែងថា ប្រជាជននៅទីក្រុងនេះបាននាំគ្នាចេញមកឈរតាមដងផ្លូវ និងទីវាល ខណៈគ្រោះរញ្ជួយដីបានបង្កឲ្យអគារនៅក្នុងទីក្រុង ជាប់ឆ្នេរសមុទ្រភាគខាងលិចតួកគីមួយនេះញាប់ញ័រ និងខ្លះដួលរលំតែម្តង។ អគារសរុបជាង ២០ខ្នងបានដួលរលំ ខណៈអគារមួយចំនួនទៀតនៅក្នុងតំបន់ ប័រណូវ៉ា (Bornova) និង បេយរ៉ាគ្លី (Bayrakli) ដែលស្ថិតនៅក្បែរចំណុចរញ្ជួយនោះ ក៏បានរងការបំផ្លាញផងដែរ។

ភ្លាមៗ មិនទាន់មានព័ត៌មានអំពីចំនួនមនុស្សរងរបួស ឬបាត់បង់ជីវិតនៅឡើយទេ។ គ្រោះរញ្ជួយដីខាងលើនេះ បានកើតឡើងចេញពីក្នុងជម្រៅដី ១០គីឡូម៉ែត្រ នៅក្នុងដែនសមុទ្រទល់មុខទីក្រុង Izmire របស់តួកគីតែម្តង។ ពេលនេះអាជ្ញាធរតួកគី កំពុងតែចេញប្រតិបត្តិការ សង្គ្រោះយ៉ាងរហ័សបំផុតទៅកាន់កន្លែងកើតហេតុ ជាពិសេសកន្លែងដែលមានអគារដួលរលំ៕