កំពង់ចាម : លោក អ៊ុន ចាន់ដា អភិបាលខេត្តកំពង់ចាម បាន ថ្លែងថា ការកសាងសង្គមជាតិ ឲ្យមានសុខសន្តិភាព ទៅបាន គឺពិតជាមានការលំបាកណាស់ ដូច្នេះសូមឲ្យបងប្អូនប្រជាពលរដ្ឋ រួមគ្នាថែរក្សានូវសុខសន្តិភាព ដែលមានស្រាប់នេះ ឲ្យនៅ ស្ថិតស្ថេរ គង់វង្សយូរអង្វែង ដេីម្បីបន្តការអភិវឌ្ឍន៍ឲ្យរីកចម្រើនបន្ថែមទៀត។

ក្នុងឱកាសនេះលោក អ៊ុន ចាន់ដា បានថ្លែងរួមជាមួយ លោក លន់លឹមថៃ អ្នកតំណាងរាស្ត្រមណ្ឌល ខេត្តកំពង់ចាម បានអញ្ជើញចូលរួម ក្នុងពិធីបុណ្យរស្មីផ្កាប្រាក់សាមគ្គី និងឆ្លងសមិទ្ធផលនានា នៅវត្តគង់វង់រង្សី ហៅវត្តកោះកុក ស្ថិតក្នុង ភូមិកោះកុក ឃុំកោះទន្ទឹម ស្រុក កំពង់សៀម ខេត្តកំពង់ចាម នារសៀលថ្ងៃទី១២ ខែកក្កដា ឆ្នាំ២០១៩ ។ អ៊ុន ចាន់ដា អភិបាលខេត្តកំពង់ចាម បានថ្លែងកោតសរសើរ ចំពោះលោក លន់ លឹមថៃ អ្នកតំណាងរាស្ត្រមណ្ឌល ខេត្តកំពង់ចាម រួមជាមួយសប្បុរសជនទាំងអស់ ដែលបានបរិច្ចាកនូវបច្ច័យ និងសម្ភារៈមួយចំនួន ក្នុងការរួមចំណែកកសាងអារាមនេះឡើងវិញ បន្ទាប់ពីអារាមមួយនេះ ត្រូវទទួលការគម្រាមកំហែងពីគ្រោះធម្មជាតិ ដោយការបាក់ស្រុតច្រាំងទន្លេនាពេលកន្លងមកហើយ ត្រូវបានផ្លាស់ប្ដូរពីកន្លែងមួយ ទៅកន្លែងមួយ ចំនួន៤លើករួចមកហើយដែរ ។

ដូច្នេះហើយលោកអភិបាលខេត្តក៏បានធ្វេីការបួងសួងទៅដល់ទេវតា និងបារមីវត្ថុស័ក្តសិទ្ធជួយបីបាច់ថែរក្សា អារាមដែលកំពុងចាប់បដិសន្ធិ នៅលើទីតាំងថ្មីនេះឲ្យបាននៅស្ថិតស្ថេរ គង់វង្សជារៀងដរាបដេីម្បី ទុកជាទីសក្ការៈបូជា សម្រាប់ពុទ្ធបរិស័ទ ជាមួយ នឹងការចូលរួមបច្ច័យកសាង ចំនួន៣.០០០ដុល្លារ សហរដ្ឋអាមេរិក លោកអភិបាល ខេត្ត ក៏បានលេីកឡើងថា ដោយសារប្រទេសជាតិ យើងមាន សុខសន្តិភាព ក្រោមការដឹកនាំដ៏ឈ្លាសវៃ របស់ សម្តេចអគ្គមហាសេនាបតីតេជោ ហ៊ុន សែន នាយករដ្ធមន្រ្តី នៃព្រះរាជាណាចក្រកម្ពុជា ទេីបយេីងមានឱកាសធ្វើបុណ្យនិងកសាងសមិទ្ធផលរួមគ្នា ។

សូមបញ្ជាក់ផងដែរថា បន្ទាប់ពីទទួលការ គំរាមកំហែង ដោយ គ្រោះធម្មជាតិ បាក់ច្រាំងទន្លេ ទៅដល់វត្តកោះកុក ដែលតម្រូវឲ្យរកទីតាំងសមស្រប ដើម្បីកសាងឡើងវិញ ដោយមានការឯកភាព ពីសំណាក់ប្រជាពលរដ្ឋ ព្រះសង្ឃ គណៈកម្មាការអាចារ្យវត្ត ជាពិសេសក្រោម ការជួយជ្រោមជ្រែង ពីសំណាក់លោក លន់ លឹមថៃ អ្នកតំណាងរាស្ត្រមណ្ឌលខេត្តកំពង់ចាម និង លោកជំទាវ សម្រេចទិញដី ទំហំ១៥០x១១៥ម៉ែត្រ នៅភូមិកោះកុក «ក» នៃឃុំកោះទន្ទឹមនេះ ដើម្បី កសាងវត្តកោះកុក សម្រាប់អ្នកភូមិជាង៣០០គ្រួសារ ក៏ដូចជាពុទ្ធបរិស័ទទូទៅ ទុកជាទីសក្ការៈបូជា ហើយក៏ បានដង្ហែព្រះពុទ្ធបដិមាក៏ដូចជា សម្ភារៈផ្សេងៗ យកមកតម្កល់ទុកជាបណ្ដោះអាសន្ន នៅលើទីតាំងខាងលេី ដើម្បីរង់ចាំកសាងអារាមថ្មីឡើងវិញ រហូតសម្រេច បានព្រះវិហារ និងឧបដ្ឋានសាលា ឬសាលាឆាន់ ១ខ្នងមានទំហំ២០x១០ម៉ែត្រ ដែលត្រូវ ធ្វើបុណ្យ ឆ្លងនាពេលនេះតែម្ដង ៕