កំពង់ឆ្នាំង៖ជើងខ្លាំងខាងប្រើប្រាស់អាវុធអាកាស្វ័យបត់គម្រាមប្រជាពលរដ្ឋកាលពីរសៀលម្សិលមិញនេះត្រូវបាន សមត្ថកិច្ចនាំខ្លួនមកកាន់ស្នងការដ្ឋាននគរបាលខេត្តកំពង់ឆ្នាំងនៅវេលាម៉ោង៧និ០០ព្រឹក ថ្ងៃទី០១ខែកញ្ញា ឆ្នាំ២០២០នេះ។គេអះអាងថាជនបង្កទំនាស់ពាក្យសម្ដីនឹងគ្នារហូតដល់ភាគីខាងអ្នកបើកបររថយន្ត(រហ័សនាម០៩)​ទាញកាំភ្លើងAK.47ពីក្នុងរថយន្តគម្រាមបាញ់ភាគីអ្នកបើកបរម៉ូតូរួចក៏បើករថយន្តចេញទៅបាត់ស្រមោលកាលពីរសៀលម្សិលមិញ។ អ្នកនាំពាក្យនៃស្នងការដ្ឋាន​នគរបាល​ខេត្ត​កំពង់​ឆ្នាំង​បានឲ្យដឹងថានៅថ្ងៃទី៣១​ ខែសីហា​ ឆ្នាំ២០២០​ វេលាម៉ោង ១៦​និង៤៥នាទីនៅចំណុច​ផ្លូវចូលចម្ការអំពៅ របស់ក្រុមហ៊ុន លោកឧកញ៉ា ញ៉ឹក ផន (ហៅកៅ) ស្ថិតក្នុងភូមិថ្នល់កែង ឃុំក្បាលទឹក ស្រុកទឹកផុសខេត្តកំពង់ឆ្នាំងកើតមានករណីទំនាស់រវាងកូនប្រុសរបស់លោកឧកញ៉ា​ ញ៉ឹក​ផន​ (ហៅកៅ)​ រហ័សនាម​ ០៩​ ជា(អ្នកបើកបររថយន្ត)និងឈ្មោះ ប្រាក់ សំបាន​ (អ្នកបើកបរម៉ូតូ​)​។
សេចក្តីរាយការណ៍​បន្តថាភាគីទាំងពីរ​ បានបង្កទំនាស់នឹងគ្នារហូតដល់ភាគីខាងអ្នកបើកបររថយន្ត​(រហ័សនាម០៩)​ ទាញកាំភ្លើងវែងពីក្នុងរថយន្តគម្រាមភាគីអ្នកបើកបរម៉ូតូ។ក្រោយពីទទួលបានព័ត៌មាននេះភ្លាម​ លោកស្នងការនគរបាលខេត្តកំពង់ឆ្នាំង​បានបញ្ជាកម្លាំងជំនាញ​និងលោកអធិការនគរបាលស្រុកទឹកផុស​ ចុះទៅកន្លែងកើត​ហេតុដើម្បីចាត់ការតាមនីតិវិធី៕