ខេត្តបាត់ដំបង៖នៅព្រឹកថ្ងៃ ពុធ ៦កើត ខែអស្សុជ ឆ្នាំជូតទោ​ស័ក ព.ស.២៥៦៤ ត្រូវនឹងថ្ងៃទី ២៣ ខែ កញ្ញា ឆ្នាំ ២០២០ នៅបរិវេណរដ្ឋបាលខេត្តបាត់ដំបងបាន​រៀបចំធ្វើពិធីប្រកាសចូលកាន់មុខតំណែង ស្នង​ការនៃស្នងការដ្ឋាននគរបាលខេត្តបាត់ដំបង ដែល​ពិធីនេះស្ថិតក្រោមអធិបតីភាព ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ តំណាងដ៏ខ្ពង់ខ្ពស់ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តី ក្រសួងមហាផ្ទៃ ឯកឧត្តម អ៊ុយ រី ប្រធានក្រុមប្រឹក្សាខេត្តបាត់ដំបង ឯកឧត្តម ងួន រតនៈ អភិបាលនៃ គណៈអភិបាលខេត្តបាត់ដំបង ។

ក្នុងពិធីនេះលោកវរសេនីយ៍ឯក សាត គឹមសាន ស្នងការរងត្រូវបានតែងតាំងជាស្នងការនៃ​ស្នង​ការដ្ឋាននគរបាលជាតិបាត់ដំបង និងបានតម្លើងឋាន​ន្តរសក្តិ ឧត្តមសេនីយ៍ត្រី ជំនួសឯកឧត្តម ឧត្តម សេនីយ៍ទោ អ៊ុច សុខុន ដែលត្រូវចូល និវត្តន៍ និងទទួលបានការតែងតាំងពីព្រះករុណា​ព្រះម​ហាក្សត្រ ជាទីប្រឹក្សាក្រសួងមហាផ្ទៃមានឋានៈស្មើអនុរដ្ឋលេខាធិការ៕